خطوة د. داليا جمال

 

 كل خطوة في حياتك ليها معنى جوَّاك.. خطوة فيها فِرِحت، وخطوة زِعلتْ وحزنت.. خطوة انتظرت، وضيعت وقت.. خطوة انكسرت، بعدها عديت وكملت.. خطوة حبيتها، وخطوة اتمنيتها، وخطوة عدت بكل تفاصيلها ونسيتها.. خطوة مستحيلة لقيتها سهلة لما قربت ليها.. خطوة ممكن تبقى كل حياتك، وخطوة من أسوأ ذكرياتك.

خطوات متقدرش تعدها، احسب بس كام خطوة كمِّلتها، حاول كل خطوة تفكر قبلها.. واوعى تندم على أي خطوة عدِّت وفاتت، كان لازم هتمشيها عشان تقدر تكمل خطوة أحلى بعديها..

اوعى تقول الوقت عدَّى وفات، دي خطوة واحدة ممكن تبقى أحلى من كل اللي فات.. مهما يعدِّي الزَّمن قول لنفسك أنا قلبي لسَّه شباب، وأقدر أمشي وأقدر أجري لو هتسند على عكاز، لو لسَّه في العمر خطوة هقدر أخطيها، ده العمر إيه غير خطوة ممكن أعيش عمري كله مستنيها.

إمضاء إعلامي من زمن تاني