الفنانة مروة عبد المنعم لجريدة البداية : أنا بختار أعمالي علي حسب الدور .. والسوشيال ميديا عنصر مهم جدا للانتشار.

 حوار :

الاء حسين عبدالوهاب

الفنانة : مروة عبدالمنعم 

تاريخ حضرتك الفني مليء بالأفلام والمسلسلات والمسرحيات التي متعتنا جميعًا.. لكن ما أقرب عمل فني لقلبك؟

والله هي كل الأعمال محببة لقلبي بس أنا بحب عباس الأبيض وزي الهوى، وإمام الدعاة ورقص على السلالم المتحركة، وعلاقات خاصة وعمر وسلمى، الحاجات دي عملت نقلات معايا.

ما الأساس الذي تختارين عليه أعمالك وأي الشخصيات تفضلين تمثيلها؟

 أنا بختار أعمالي على حسب الدور حلو ولا لأ، أعرف أمثله ولا لأ، هل في حاجة جديدة سواء كوميدي أو دراما مش بيفرق معايا كبر أو صغر الدور على أد ما بيفرق معايا في مشاعر في مشاهد مهمة يبان فيها التمثيل.

طال غياب حضرتك عن الشاشة ما السبب؟ وهل من أعمال جديدة في الفترة القادمة؟ 

هو انا فعلًا غيبت شوية عن الشاشة بس كنت بعمل حاجات تانية أسست فرقة في مسرحية وعملت مشروع مسرح بتاعي مسرح الأسرة والطفل عملت فيه أربع مسرحيات؛ سنووايت، وأليس، وربانزل، وجميلة والوحش، كان حلمي إني أعمل سلسلة ديزني دي كلها.. في أعمال قريبة إن شاء الله في بقينا اتنين إخراج طارق رفعت هينزل قريب، وفي طبيبة شرعية إخراج شادية أبو شادي إن شاء الله هينزل في خلال ١٥ يوم، وفي لرمضان مسلسل قلع الحجر إخراج حسني صالح.

حازت أغنية حضرتك مع ابنتك حور "البنت مجنناني" على إعجاب الجميع.. هل تفكرين في الاتجاه إلى الغناء بشكل احترافي؟ 

فكرة إني أتجه للغناء التمثيلي مش عارفة بصراحه بس أنا حابه التراك ده مش رفضاه بس هي أغنية البنت مجنناني جت كده بالصدفة، أنا مع نفسي بكتب أغاني وأغنيها وقريب ممكن أنزل أغنية من تأليفي بس مش على مستوى احترافي، أنا بعملها مع نفسي إخراجي وتأليفي وإنتاجي وكل حاجه وبنزلها على السوشيال ميديا، ولكن لو أتاحت ليَّا فرصة الاحتراف نعملها طبعا.

الفيديوهات التمثيلية الكوميدية التي تنشريها على الفيس بوك أضحكت الملايين.. حدثينا عن كواليسها؟

 والله الكواليس مش عارفة أحكيلك ايه ولا ايه ولا ايه هي جت كده بالصدفة معايا من وقت الكورونا عملت التيك توك وبعدين حبيت يبقى ليا محتوى مبقاش مجرد بطلع أقول أي كلام وخلاص ودورت في المحتوى وكانت أكتر حاجه متاحة وقتها هي إني أتكلم عن التربية وسنينها وعملت هاشتاج التربية وسنينها، وبدأت أعمل التفاصيل اللي بتحصل في الحياة اليومية بين الأم وبنتها وبقيت بعالجها بصورة كوميدية.

في الفترة الأخيرة لاحظنا اهتمام حضرتك بالسوشيال ميديا.. فما هو سبب تفضيلك لها؟ 

هو أنا مش مفضلة السوشيال ميديا ولكن السوشيال ميديا عنصر مهم جدًّا في الانتشار وبعد كده لقيت النجاح وتفاعل الناس معايا وهو حلو في حاجة إني بقدم المحتوى بتاعي أو الفكر بتاعي أنا واللي أنا عايزه أقولك وبقدمه براحتي وبلاقي فيه نفسي وحريتي مثلًا لو في حاجه عايزه أقول رأيي فيها بقوله يعمل سكيتش بنقد فيه حاجه بعملها برأيي بقدم المحتوى إلى أنا عايزاه عكس التمثيل بعمل الحاجه إلى بتتعرض عليَّ فأنا حبيت ده في السوشيال ميديا.

ممكن حضرتك تقدمي كلمة للشباب المقبلين على الفن والتمثيل.

النصيحة اللي أقدمها للشباب عايزه أقولهم أهم حاجة متبحثوش عن الكم ابحثوا عن الكيف وفكروا في الدور متفكروش في المساحة وميكنش هدفكم هو كسب المال فقط والشهرة وياريت اللي يدخل الفن يبقى فعلًا حابب الفن وحابب يقدم فيه حاجه دوروا على المحتوى والثقافة؛ لأنهم مهمين جدًّا لأن للأسف الناس كلها فاكرة إن الفن عبارة عن همثل هركب عربية مش بيدخلوها من تراك الفن فادخل الفن عشان بتحب الفن.