مروة الشافعي .. خريجة تجارة إنجليش.. شيف أثبتت جدارة كبيرة في مجالها عانت في البداية، ولكنها الآن صارت من شيفات مصر المعدودات .. اقتربنا منها فماذا قالت عند استقبالنا
أهلًا وسهلًا بك يا حبيبتي، أهلًا وسهلًا أنا تشرفت جدًّا بالمقدمة الظريفة وبالحوار إن شاء الله
إزاي كانت البداية في مجال الطبخ؟
>> أبدًا أنا يعني خريجة تجارة إنجليزي، اتجوزت وخلفت على طول ولا اشتغلت ولا كان في دماغي خالص أي حاجة، أنا بحب طول عمري الأكل، يعني اتذوقه حلو كده، أحب الأكل وكنت وأنا صغيرة كده ذراع ماما اليمين زي أي بنت أشوفها بتعمل ايه كده وبس على خفيف، زي أي بنت يعني عادية خالص لغاية بعد ما اتجوزت وخلفت وبناتي بقى هما السبب الرئيسي إن أدخل مجال الطبخ؛ لأني كنت مهتمة جدًّا إن أنا أعمل لهم أكل في البيت بإيديا، كنت بخاف عليهم قوي وعلى صحتهم أكتر حاجة أضمنها إن أنا ابقى عامله الأكل في البيت بإيديا كده بنظافة، فده كان يعني مهم بالنسبة لي، فأنا طبعًا ما كنتش مُلمة بقى بكل الوصفات بتاعة الشارع البرجر والبيتزا والكب كيكس والدونات سينبون حتَّى الشيبسي، كل الحاجات دي اللي في الشارع وده بقى أخذته تحدي مع نفسي، بقيت بجرب وكنت بتعامل مع جوجل على إنه إنسان عايش معايا.
>إيه أكبر التحديات اللي واجهتك في شغلك وإزاي قدرتي تتغلبي عليها؟ >>تحديات رهيبة طبعًا يعني من واحدة ست عادية لا مشهورة ولا أي حاجة وعندك عيال، فجأة بقيت يعني بقيتي معروفة لو أنا ماشية في الشارع أصلًا يعني أمشي في الشارع بستغرب إن الناس عرفاني فاكرة إنهم عرفوني على النت بس على فيسبوك والانستجرام واليوتيوب، وشكرًا لكن الناس على الحقيقة وتلاقي الناس تتلم عليك ويتصوروا معاكي دي كلها كانت تخض، وكمان تخض ولادي وطبعًا جوزي كان مستغرب جدًّا، كان من أكبر التحديات إن هو شخصيًّا مش مستوعب إزاي أنا متجوز واحدة قاعدة في البيت، إزاي بقيتي مشهورة، أصعب حاجة ممكن تتخيليها؛ لأن الإنسان اللي مش قوي وعنده عزيمة وثبات وإصرار هيزهق ويقفل بسرعة ويطلع يمشي يجري؛ لأن مفيش أبدًا حد ناجح إلا لما هتلاقي حواليه ناس عايزه توقعه وعايزه تغلوش عليه، عايزه تقلده كل دي تحديات أنا قابلتها صعبة جدًّا جدًّا، وبحمد الله إن متبعتش يخليني أهبط وأقعد، لا كان عندي دايمًا عند كده في إن أنا لا هكمل مهما حصل هكمل؛ لأن طبعًا لما أي إنسان لما بيحس إن هو عمل حاجة وتبتدي الناس تقلده فيها تقلده بالظبط بنفس الطريقة بنفس بيبقى محبط جدًّا، ودي حاجة من التحديات اللي كانت بتخليني كل شويه عارفه إن أنا اللي بتقلد بيحاول يهديك.
ايه أكثر الأخطاء اللي الناس بتعملها في المطبخ؟
>> للأسف في أخطاء كثيرة قوي في منها أخطاء أنا نفسي كنت بقع فيها؛ نظرًا لخبرتي القليلة لغاية مع الوقت ابتديت أعرفها وفي أخطاء يعني أنا ببقى شايفه، لكن يعني أشهر الأخطاء إن ممكن ناس تستبدل مكونات تانية مش مناسبة، يعني في وصفات لازم استخدم فيها زبدة ما ينفعش سمنة يلا مش مشكلة مثلًا في مكون ضروري في الوصفة هيفرق في طعمها جدًّا ولما نغيرها مش هتأثر أبدًا على طعم الوصفة، لكن في حاجات لما بتتغير بتبوظ طعمها وبتبوظ شكلها، فالأخطاء بتاعة استخدام بعض المكونات عن المكونات تانية، زي مثلًا نقول مثلًا في البيتزا عايزين نستخدم مثلًا الصلصة بتاعة البيتزا نعمل ونسوي فيها يعني، مش عارفه يعني كل حد ليه أخطاؤه، وكل حد يعني بيعمل الوصفة على مزاجه أنا ما بحبش كده، مع إن الأكل بحر واسع يعني أنا من المدرسة بتاعة علم الأكل بحر واسع، وكل حد يعمل اللي على ذوقه يعني، ما فيش حاجة تبقى قانون..
>ما الفرق بين الطبخ التقليدي والابتكاز في المطبخ؟
>>في فرق بين الطبخ في البيت والطبخ في المطاعم؟
اه طبعًا طبعًا فرق كبير يعني، أنا مع احترامي للمطاعم وكل حاجة وطبعًا طبعًا أوقات كتير جدًّا بروح آكل في مطعم أنا وأولادي بنتعزم وبنعزم يعني في ظروف كتير بتخليني أروح أعمل في أي مطعم يعني معنديش مشكلة بس طبعًا مش أي مطعم، أنا موسوسة قوي دلوقتي خلاص بناتي كبروا بقى يعني مش زيي كانوا أطفال، كنت ببقى قلقانة عليهم جدًّا لا دلوقتي بنجرب ممكن ناكل نشوف الأكل بس، هو المطعم بيبان، يعني من شكله كمان والناس اللي شغالة فيه، يعني مجرد إن أنا أبص لهم وأبص للمكان ده بيبقى إجابة عن المكان ده كويس ولا لأ بنسبة يعني 60 ــ70%.
عندك نصائح للي بيشكوا من إنهم مش لاقيين وقت للطبخ؟
>>طبعًا الله يكون في عون أي واحدة ست بتضطر تشتغل، يعني الفكرة في تنظيم الوقت قصصهم كده إن أنا أخلص اللي ورايا عشان طول الأسبوع ابقى مرتاحة محضرة كمية كويسة من اللحمة المفرومة متعصجة ومحطوطة في الفريزر، عايزه أعمل مكرونة بالبشاميل مش هتاخد وقت أبدًا..
>في أكلة تحبي تعمليها لأصحابك أو لعيلتك بشكل خاص؟
>> اه طبعًا يعني أنا بحب قوي قوي أعمل لعيلتي يعني الحمام جدًّا هم بيحبوا الحمام بتاعي أوي، وصنية الرقاق باللحمة المفرومة، وبردوا البط بيبقى برده بيحبه جدًّا والملوخية والمكرونة البشاميل يعني، والمحشي طبعًا دايمًا لما أحب أعمل لهم الحاجات دي وأنا كده مستمتعة مبسوطين قوي.
>لو واحد حابب يتعلم الطبخ ايه أول حاجة لازم يعرفها؟
>>والله ولا أي حاجة أي حد يقدر يتعلم الطبخ مفيش مشكلة خالص، أنا بتفرج على وصفة الواحد بيبقى عنده خبرة، بقى بيبقى عارف إن ده مع ده هيطلع حلو، إن ده مع ده صح، إن الكمية دي قليلة؛ لأن الكمية دي مناسبة أو لا، دي كده كمية كبيرة، مع الخبرة البنت إنها تتفادى كل الكلام ده مش زي زمان، يعني كان زمان الدنيا برده مقتصرة على البنت، تتكلم مامتها تكلم حماتها مثلًا، تحاول تسأل ممكن اللي هي عملاها دي حلوة واللا لا، إلا إذا بقى كانت دقيقتها عندها مثلًا وقالت لها بقى قولي لي أنت عملت مثلًا الأكل دا إزاي وبقت الوصفات كلها موجودة بطرق مختلفة وبأفكار مختلفة، ده بقى بيسهل قوي إن أي حد عايز يعمل أي وصفة يشوف الشيف اللي بيتابعه ويفتح البرنامج بتاعه، أو هيفتح الصفحة بتاعته ويشوف المقادير ويعمل الوصفة بمنتهى السهولة.
>نظام غذائي معين بتتابعيه في حياتك اليومية؟
>>لا والله أبدًا يعني أنا ست بحب الأكل بصفة عامة، لكن مفيش نظام معين أنا يعني يُمكن أكتر حاجة اللي لازم يوميًّا أعملها هو كوباية الشاي بلبن ده يفرق معايا كده وبحبه جدًّا، وبحس إن هو حاجة كده بتطبطب عليَّ وجميلة، لكن غير كده عادي بقى، يعني ايه الأكل اللي موجود بياكله القدر اعمله بعمله الحياة بسيطة، يعني مفيش طقوس تانية خالص هو الشاي أهم حاجة.
>ما هي نصيحتك للشباب؟
طبعًا أنا شايفه إن الشباب ما شاء الله يعني في الجيل اللي موجود دلوقتي، يعني كلهم كده دماغهم كويسة وغيرنا برده الواحد يعني جيلي أنا مع إن أنا جامد أوي، أنا جيل الثمانينات اللي هو جيل جامد آخر حاجة، لكن الأجيال اللي موجودة دلوقتي أنا شايفه إن هم أنصح ما شاء الله عليهم شايفاهم بيتعلموا من الخبرات اللي حواليهم، يعني أنا شايفه إن في اختلاف قوي يعني كبار كده، يعني كبار في عقليتهم والحياة اللي شايفنها، أتمني بس يكون عندهم أهداف في حياتي حاجة مهمة جدًّا.
0 تعليقات