الفنان ماجد المصري:
المسرح مدرسة.. والسينما مُنتهى الإغراء
الحضور الطاغي أهم ما يميزه على الشاشة، يأثرك بروحه وأدواته داخل كل شخصية يقدمها، لا يجسدها فقط بل يذوب في تفاصيلها، صاحب كاريزما مختلفة، وأدواره المختلفة دليل على موهبته وإبداعه وحرفيته.. إنه الفنان والنجم الكبير ماجد المصري في هذا الحوار لمجلة البداية.
• قدمت أعمالاً كثيرة أثرت في الدراما المصرية، ممكن تكلمنا عن بداية مشوارك؟
بداية مشواري الفني كانت مع السينما، واشتغلت مع مخرجين كبار زي داوود عبدالسيد، ورأفت الميهي، وخيري بشارة، ومحمد عبدالعزيز، وعمر عبدالعزيز، وسعيد مرزوق، كانت بداية سينمائية قوية في مسلسلات زي التوأم مع مجدي أبوعميرة، وخيال الظل مع يحيى العلمي، الحمد لله عندي تاريخ كبير في السينما والدراما.
• مشوارك الفني مليء بالأعمال، أيها أقرب إليك؟
كل الأعمال اللي عملتها تقريبًا قريبة جدًّا إلى قلبي، لأن أنا لما بدخل حاجة ببقى فعلاً حاببها، مش مجرد إننا بنشتغل وخلاص، لا، أنا بشتغل عشان حابب العمل الفني نفسه، وحابب الشخصية اللي بعملها، فكل حاجة أنا قدمتها على الشاشة فعلاً بشتغلها بمنتهى الحب.
• ما سر اتجاهك لأدوار الشر في أعمالك الأخيرة؟
الأدوار الشريرة بتغريني بصراحة جدًّا، يعني أنا بالنسبة لي بحس إن تفاصيل الشخصيات الشريرة بتبقى تفاصيل ممتعة في التمثيل، والحمد لله كل مرة بنجح.
• ماذا عن أدوار البطولة في حياتك؟
كل الأعمال السينمائية إللي أنا اشتغلتها كنت بطل فيها، وحاليا أنا بلعب الأدوار اللي بتغريني أكثر مش بجري ورا البطولة، لأن أكيد طبعا السينما بتتغير والنجوم بتتغير، وده شيء طبيعي، واحنا دلوقتي بندور علي الدور الحلو المؤثر اللي يوصل للناس.
• حدثنا عن دورك في فيلم خمس جولات؟
بحب الفيلم ده جدا، كنت بساعد الشباب اللي فيه ياخدوا خطوة، وبعتز بيه جدا.
• ما الأقرب لقلبك العمل السينمائي أم المسرحي، ولماذا؟
بحب المسرح بس مشكلتي معاه الوقت، المسرح هو المدرسة الحقيقية، والسينما طبعًا هي الإغراء الأكبر، بس المهم في الآخر إن العمل الفني أيًّا كان لازم يتقدم على أعلى مستوى.
• هل عرضت عليك أعمال فنية ورفضتها؟
فيه أعمال طبعًا برفضها كتير، بحس إن أنا هكرر نفسي، وغالبًا مبحبش إني أعلن وأقول اعتذرت عن كذا كذا للمخرج الفلاني، أو للمؤلف الفلاني، أو للشركة الفلانية، لأنه هو احترمني، واتصل بيَّا، فلو أنا هعتذر هعتذر برضه أعمله تليفون وخلاص، مش لازم أكتب ده في الصحافة.
• إيه الشخصية اللي كان نفسك تجسدها حتي لو بدون أجر؟
أنا معنديش دور معين يعني كان نفسي أعمله، ولكن طبعا عشان أشتغل بدون أجر دي لازم يكون حاجة تخص بلدي الحبيبة، مصر، حاجة هتفيد الناس، حاجة هتبقى مؤرخة باسمي وإضافة كبيرة لتاريخي الفني.
• وماذا عن علاقتك بالسوشيال ميديا؟
كل اللي عندي إنستجرام فقط، لأن أنا كسول شوية في السوشيال ميديا.
• هل هناك أعمال جديدة سنراها قريبًا؟
حاليا أصور فيلم الغربان، والفيلم ده هيبقى نقلة كبيرة جدًّا في السينما العربية، وبالنسبة للمسلسلات، أنا بعمل حاليا مسلسل خليجي اسمه زوجة واحدة لا تكفي، ده بطولتي مع الفنانة الكويتية الكبيرة هدى حسين ومجموعة كبيرة نور الغندور وآيتن عامر وشيماء يونس، وإن شاء الله يعجبكم.
• ممكن تقدم نصيحة للأجيال الصاعدة من الفنانين؟
نصيحتي للأجيال اللي لسه بتبتدي في الفن مش هقولهم أكثر من إن الشغلانة بتاعتنا دي جميلة جدًّا ومعطاءة وكل ما تحبها وتتعب فيها وتحترمها هتديلك النجومية وهتديلك التميز وكل حاجة، وربنا يوفق الجميع.
0 تعليقات