فتوح أحمد.. فنان الزمن الجميل
شارك ممثلًا ومخرجًا في أعمال مميزة
صاحب بصمة فنية رائعة
المسرح والسينما والتلفزيون .. ميادين عمل تفوق فيها
الفنان فتوح أحمد واحد من عناقيد الموهوبين في مجاله تمثيلًا وإخراجًا.. شهدت موهبته تألقًا لافتًا على خشبة المسرح واستوديوهات تصوير المسلسلات، وكذا أيضًا المجال السينمائي..
قدَّم خلال مشواره الفني عديدًا من الأدوار المتميزة التي ما زالت عالقة بذاكرة المشاهدين سواء في مسلسلات تلفزيونية أو أفلام سينمائية.
التقينا بالفنان القدير فتوح أحمد وكان لنا معه هذا الحوار
بداية نودُّ أن نرحب بالفنان فتوح أحمد ونسعد بوجوده معنا اليوم لإجراء هذا الحوار الحصري لجريدة البداية التي تصدر عن قسم الإعلام التربوي بكلية التربية النوعية ــ جامعة عين شمس.
>حدّثنا عن شعورك بعد تفاعل الجمهور مع دورك في مسلسل جعفر العمدة؟
>>الجمهور تفاعل جدًّا مع المسلسل؛ لأنه هو كان فيه التوليفة اللي الناس بتحبها، ومحمد رمضان أساسًا محبوب جدًّا.. وكانت المفاجأة بالنسبة لي يعني أنا عارف إن محمد رمضان بينجح جدًّا في الحارة المصرية والريف المصري؛ لأنه منهم وهما شايفين فيه ده، وكانت المفاجأة بالنسبة لي أن يكون لكل الطبقات.
>مسلسل "المعلم": شارك فيه الفنان فتوح أحمد بجانب مصطفى شعبان. وصف إن مشاهد التصوير في سوق السمك بأنها الأصعب... ممكن تحكلنا التجربة؟
>> مسلسل المعلم كانت أحداثه بتدور في سوق السمك، وسوق السمك كان مبني في استوديو الأهرام، والحقيقة كانت تكلفته عالية جدًّا؛ لأنهم كانوا بيجيبوا سمك كل يوم سمك حقيقي وطازة، فكانت العربيات يوميًّا بتجيب سمك من السويس، وآخر النهار كانوا بياخدوا السمك يبيعوه أو ياخدوه ياكلوه، الحقيقة مش عارف كانوا بيعملوا فيه ايه.
> يا ترى الفنان فتوح أحمد هيمتع جمهوره بعمل جديد في رمضان القادم 2025؟
>> بالنسبة لي أنا في مسلسل اسمه حكيم باشا مسلسل صعيدي، أعتقد إنه هيعجبكم جدًّا جدًّا، ودى أول مرة مصطفى شعبان يعمل مسلسل صعيدي، عمومًا الصعيدي معمول في المسلسل ده بطريقة مودرن، نوعية هتعجب المشاهدين في رمضان جدًّا.
>ما وجهة نظرك في مهرجان الرياض لهذا العام؟
>>الحقيقة أنا مرحتش مهرجان الرياض خالص ولا مرة، لكن الحقيقة شيء مبهر وهما عاملين حاجة صح، يعني إمكانيات يعني فبيعملوا كل حاجة زي ما الكتاب بيقول، مش بيستخسروا يعني، بيصرفوا صرف جامد.
>يستخدم المخرجون ظاهرة الذكاء الاصطناعي في الأفلام والمسلسلات، يا ترى أنت كفنان مع أم ضد هذه الظاهرة؟
>>ده اسمه إبهار وإحنا من زمان كنا بنشوف أفلام أجنبي عاملين حاجات مبهرة، والذكاء هيزود الإبهار، وأعتقد دي ممكن تقلل دور الممثل هيروح في حتة الصناعة، غير الأعمال اللي بتبقى معتمدة على أعمال الممثل بس.. المفروض دي نوعية ودي نوعية، المفروض في نوعية تعتمد على البشر اللي هو الممثل وبس دون الذكاء الاصطناعي.
> ما نصيحتك للشباب الراغب في دخول عالم الفن عمومًا؟
>>المشكلة دلوقتي إني الشباب عاوز تلعب كرة زي محمد صلاح واللي عاوز يمثل.. في الحالتين لازم يشوف أي حد أي نجم سواء محمد صلاح أو فنان هو عمل ايه في مشواره، المسألة مش تمنيات لازم يبقى عندك المقدرة يعني اللي عاوز يلعب كرة يبقى موهوب، يكون بيعرف يلعب كرة، عنده عقلية يفكر إزاي دا لو الموهبة موجودة.. إزاي يطور نفسه.
0 تعليقات