محمد ناصر .. فنان بدرجة "إنسان":
فرط الحركة .. كان البوابة الأولى لاكتشاف موهبتي مبكرًا جدًّا
..المسرح صاحب فضل كبير عليَّ
تعلمت من كل شخص قابلته في حياتي
نصيحتي لكل مبتدئ.. اشتغل على نفسك واستمر فيما تعمل..
الفنان الشاب محمد ناصر واحد من فناني هذا الجيل .. بدأ رحلته مع الفن مبكرًا .. احتضنها المسرح فكان اتجاهه للعمل المسرحي أكثر كثيرًا عن أعماله الأخرى سواء في دراما السينما أو التليفزيون..
البداية كانت صاحبة السبق التقت الفنان الشاب وأجرت معه هذا الحوار
أولًا أحب أهنئك على آخر جائزة ليك جائزة أفضل ممثل دور أول بمهرجان نقابة المهن التمثيلية عام ٢٠٢٤.
>متى اكتشفت موهبتك في التمثيل؟
>>اكتشفت موهبتي بسبب إن أهلي حسو إن عندي طاقة زيادة عن أصحابي اللي معايا في المدرسة، فعلى طول دخلوني قصر الثقافة واتعلمت كل المجالات الفنية هناك زي التمثيل والرقص والغناء.
>هل كان حلمك تكون ممثل أم جاء ذلك بمحض الصدفة؟
>>كان نفسي وأنا طفل أن أكون مشهور في الفن بس هتخصص ايه، دي كانت الصدفة الربانية إن أتحط في الطريق ده بس من وأنا طفل كنت بتعامل في البيت وفي المنطقة إني مشهور طفل بقا يا ببلاوي، ما إحنا كنا أطفال 😅🤣 >هل تذكر أول عرض شاركت فيه .. وهل تتذكر شعور أول تصفيق للجمهور؟
• أيوه طبعًا مسرحية اسمها (رحلة كمبيو) كنت طفل ساعتها وكان عندي ١٤ سنة مثلًا وأخدت أحسن ممثل في مهرجان للأطفال أخدت الجائزة دي في الفترة دي وفي العرض ده … ومكنتش مصدق إن الناس دي بتضحك على كلامي أو بتسقفلي
>الأدوار المسرحية التي لعبتها وما زالت راسخة في ذهنك؟
>>طبعًا بفضل فاكر أدواري كويس جدًّا من أول ما بدأت لغاية دلوقتي …. بتبقا عشرة بينك وبين الشخصيات اللي ممكن تصنعها في شهور وتفضل تمثلها سنين فكلهم كانوا عشرة السنين.
>بما إن بدايتك مسرح أيهما أقرب لك المسرح أم الشاشة الصغيرة؟
>> الاتنين قريبين من قلبي، لكن المسرح هو صاحب الفضل بعد ربنا.. المسرح إداني ٨٠٪ من أسلوب الشاشة الصغيرة وبيجي بعد كده ال ٢٠٪ بتوع أسلوب الشاشة الصغيرة واللي هو إحنا بنبقا واقعين زيادة عن اللازم لازم نكون أهدى ومستوى تعبرنا ودرجة صوتنا لازم تكون أهدى بس.
>المخرجون أو الممثلون الذين تعامل معهم (محمد ناصر) وتأثر بهم أو استفاد من العمل معهم؟
>> أكيد كل شخص وقف معايا في الرحلة دي حتَّى لو دقيقتين عشان يقولي ملحوظة أو حتَّى اتعلمت منه وهو مش واخد باله …. أكيد اتعلمت منه … بس في ناس بتبقا سبب في حياتك عشان تساعدك طول ما أنت في الرحلة طول الوقت، ودول حاجة تانية خالص غير اللي ممكن تتعلم منهم دول بيبقوا فاهمينك أكتر وعارفين رد فعلك، والنوع اللي ممكن تكون بتحبه أو بتجيد فيه بيبقوا زي مصدر القوة طول الوقت والحمد لله إنهم في حياتي.
>هل تتقبل النقد؟ وبماذا ترد على من انتقدك؟
>> بصراحة مش طول الوقت أول ما بتأكد إن ده شيء غلط بتقبل … لكن جايز أكون أنا بغامر بشكل مختلف أو محدش شايف أو مش عارف، أنا جايز أكون بغامر بشكل صح غير بعد ما بيحصل ووقتها برضوا بتعرض للنقد بس هنا كتير أوي بصمم إن عادي أديني بجرب.
>>برأيك ما هي مقومات الفنان الناجح؟
>>الاستمرارية إن كل يوم يقوم يمتهن المهنة دي حتَّى لو تحت السلم، أهم حاجة يفضل يمثل أو يفن بغض النظر ايه نوع الفن، بس لازم كل يوم يكون بيمارس اللي بيحبه أو بيعرف يعمله..
>ما هي نقاط القوة الخاصَّة بك وما يميز محمد ناصر عن غيره من فناني جيله؟
>>السؤال ده والله ما دبلوماسية، بس أنا بعيد كل البُعد إن ممكن أحدد ده أو أقول رد عن السؤال ده … لكن اللي أعرفه إن طول الوقت في دلايل بتحدد أنت موفق وكويس واللا لا، وأنا دايمًا ببحث عن الدلائل دي عشان أتأكد إني في طريقي الصحيح، وعارف و مقتنع إن مش كل الناس هتقتنع بيك بس اللي هيقتنع بقا هو اللي يحدد أنا مميز في ايه، أو مش مميز في ايه؛ عشان أعرف أشتغل عليه وأصححه.
>ما تقييمك لنفسك وما وصلت إليه حتَّى الآن؟ وما الدور الذي تعتبره كان نقلة فنية لك؟
>> اللي وصلت له لغاية دلوقتي الحمد لله راض جدًّا ومبسوط بكل خطوة ربنا بيقربها مني، أو بكل خطوة ربنا بيبعدها عني بكتشف إن هي كانت لمصلحتي … و الدور هو مسلسل طاقة نور عشان عرف الناس عليَّ بدري
شرفت بالحوار مع حضرتك وشكرًا على وقتك منتظرينك بمزيد من الأعمال الناجحة إن شاء لله
0 تعليقات