عمر فوزي الصاعد الواعد:
أسرتي أثرت فيَّ بشكل إيجابي جدًّا
أتمنى الوقوف أمام توم كروز ومحمد رمضان
علاقتي بوالدتي أكثر من رائعة
والشباب في بداية مشوارهم .. الثقة بالله والاجتهاد كلمة السر
في البداية نرحب بضيفنا الفنان والنجم الصاعد عمر فوزي ابن المنتج محمد فوزي، والفنانة الجميلة وفاء عامر، ونسعد بوجوده معنا لإجراء هذا الحوار الحصري لجريدة البداية التي تصدر عن قسم الإعلام بجامعة عين شمس.
>بدايتك كانت في مسلسل بيت الشدة وكانت خطوة مهمة في مسيرتك الفنية كيف أثرت هذه التجربة على نظرتك للتمثيل؟
>>طبعًا نظرتي للتمثيل دى حاجة أنا أحببتها جدًّا، ولكن طبعًا التجربة كانت صعبة وأثرت عليَّ جدًّا لما شوفت ردود الأفعال وخليتني يبقى عندي حافز إني أكمل وأطور من نفسي، وأسعى وراء الموضوع وأتعلم فيه أكتر.
>ممكن تكلمنا عن رد فعل أهلك لما شافوك على الشاشة وبتمثل وإعجابهم بأدائك؟
>>أهلي كانوا صرحاء جدًّا جدًّا، المشاهد اللي كانت كويسة كانوا بيشيدوا بيها والمشاهد الأخرى كانوا بيعرفوني ويحاولوا إنهم يقولولي الصح من الغلط حتى لا تتكرر ثانية، وطبعًا كانوا بيدوني نصائح إني أخد ورش أكتر وأتعلم تمثيل أكتر؛ لأني لسه مش واخد ورش تمثيل كفاية أو مش مثقف كفاية..
>ما الدور الذي تحلم بتقديمه على الشاشة؟
>>دور الشاب اللي هو ابن البلد، الشاب اللي طالع من منطقه شعبية عادي ومن أنحاء شعبية عادي، ويعيش الأجواء الشعبية كلها، فهو ده اللي نفسي فعلًا إني أخوض التجربة في دور زي ده.
>ما التحديات التي واجهتك كممثل شاب في بداية مسيرتك الفنية؟
>>التحديات طبعًا إني أقف قدام الكاميرا دي كانت بالنسبة ليَّا تحدي، كنت حاسس إني واقف قدام مديري في شغل مثلًا فطبعًا مينفعش أغلط ويحاول على قد ما تقدر إني أثبت وجودي، وبالذات إن دي كانت أول مرة أقف فيها قدام كاميرا فطبعًا المسألة كانت واحد ضد واحد.
>الأب المنتج الكبير محمد فوزي والأم الفنانة وفاء عامر وخالتك الفنانة أيتن عامر، حدثنا كيف أثرت نشأتك في بيت فني على شخصيتك واختيارك لدخول عالم التمثيل؟
>>طبعًا لما أروح أحضر معاهم التصوير وأحضر معاهم لوكيشن وأكون معاهم، وأشوف المشاهد وهي بتتصور والحاجات دي كلها، وطبعًا والدي منتج سينمائي فطبعًا كنت بحضر برضه تصوير مسلسلات؛ بالتالي أنا عجبني الموضوع وحبيت جدًّا الموضوع وأن أستمر فيه وأمارس التجربة في التمثيل وطبعًا في مفاجآت كتير بعد كده.
>إذا أتيحت لك فرصة التمثيل أي فنان عالمي ستختار؟ ولماذا؟
>>في ممثلين كتير جدًّا وأنا مش عايز أنسى اسم ممثل، بس ممكن نقول توم كروز بس دي حاجة مش دلوقتي يعني، بس في الواقع طبعًا نفسي أمثل مع محمد رمضان جدًّا حتى لو مشهد؛ لأن محمد رمضان ممثل جميل جدًّا وأنا كمان عارفه على المستوى الشخصي فطبعًا نفسي أمثل معاه فأكيد حاجة زي دي هتضيف لمسيرتي.
>ممكن نشوفك في عمل جديد في الأيام المقبلة؟
>>إن شاء الله في مسلسل اسمه بدون مقابل، ده أنا طالع فيه دور كده أكبر شوية من الدور اللي كنت واخده في مسلسل بيت الشدة وإن شاء الله يعجبكم.
>نلاحظ علاقتك القوية بوالدتك وظهوركم الدائم على السوشيال ميديا، كلمنا عن علاقتك بالفنانة الجميلة وفاء عامر؟
>>طبعًا والدتي علاقتنا ببعض غير إنها علاقة أسرية إحنا قريبين من بعض جدًّا حتى العلاقة في الفيديوهات بتكون علاقة طالعه تلقائية وبحب.
>رسالة توجهها إلى عائلتك ما الذي تحبه قول الآن؟
>>أحب أقولهم أنتم كل حاجة في حياتي وأنتم بإذن الله اللي هتكونوا سر نجاحي في المستقبل إن شاء الله.
>هل هناك أحلام فنية بيطمح الفنان عمر فوزي في تحقيقها مستقبلًا؟
>>طبعًا نفسي أولًا غير التمثيل نفسي إني أطور الصناعة اللي هي الإنتاج السينمائي والمسرح والأفلام والمسلسلات، والدي وأستفيد من خبرته وأطور معاه من الصناعة.
> في الختام ما هي نصيحتك لشباب جيلك؟
>>ده سؤال حلو جدًّا وأنا بحبه جدًّا، دايمًا يبصوا للحاجات الإيجابية ومتبصش للحاجات السلبية، دي رقم واحد، رقم اتنين إنه لازم يكون عندك ثقة في ربنا إنه قادر يخليك تحقق حلمك وإنه لازم تسعى "اسعى يا عبد وأنا اسعى معاك" وخلي عندك يقين ودايمًا قول يارب، ودايمًا وأنت بتبقى ادعى أنه حلمك يتحقق وبإذن الله ربنا عمره ما يخيب ظنك أبدًا ولو لا قدر الله يعني مش هقول إنك فشلت بس لو منجحتش من أول مرة حاول تاني مرة أو تالت وعاشر مرة، حاول برضه وبإذن الله هتوصل. في نهاية حوارنا لا يسعنا إلا أن نتمنى للنجم الصاعد عمر فوزي مزيدًا من النجاح والتألق في مسيرته الفنية، شكرًا لك عمر على وقتك وعلى هذه الفرصة للتعرُّف على جوانب جديدة في شخصيتك ومسيرتك، ونتطلع لرؤيتك في أعمال قادمة تبهرنا جميعًا.
0 تعليقات