الشيف فاطمة أبو حاتي: أول ظهور ليَّا كان في سي بي سي سفرة

 الشيف فاطمة أبو حاتي:

أول ظهور ليَّا كان في سي بي سي سفرة

المعجنات .. عشقي الأوَّل

توفيق ربنا .. أساسه إخلاص النية

نودُّ أن نرحب بالشيف فاطمة أبو حاتي ونسعد بوجودها معنا اليوم وبنشكرها على إجراء هذا الحوار الحصري لجريدة البداية التي تصدر عن قسم الإعلام التربوي بكلية التربية النوعية ـــ جامعة عين شمس. 

أهلًا وسهلًا بكم معنا في حوار مميز جدًّا مع نجمة المطبخ اللي أبدعت في قلوبنا قبل أطباقنا، الشيف فاطمة أبو حاتي في اللقاء ده هنغوص في أسرار نجاحها، حياتها اليومية، وأكثر الوصفات اللي عملت صدى كبيرًا بين جمهورها. خليكم معانا علشان تعرفوا أكتر عن الشيف الإنسانة قبل الشيف النجمة.

كيف كانت بداية رحلتكِ مع المطبخ؟

والله أنا لم اكتشف نفسي هما اللي اكتشفوني، رحلتي مع المطبخ بدأت من وأنا صغيرة جدًّا، من وأنا يعني بعد الابتدائي بشويه كده دخلت المطبخ.. ماما ست مصرية أصيلة فحبت تدخل بنتها الكبيرة معاها المطبخ تعلمها وكده تؤهلها لما بعد ذلك يعني، ولما كبرت بقى واتجوزت وبقيت أنا بحب المطبخ جدًّا بعمل حاجات مختلفة، بقرأ كتب كثيرة عن الطبخ مكنش في برامج كانت لسه البرامج مش موجودة، بدأت مؤخرًا الفيديوهات اللي على السوشيال مكنتش موجودة خالص فكنا بنتجوز وإحنا معانا كده كتب مجلدات حلوة قوي للطبخ، كنت بجرب منها وكتير بقوا يجوا عندي ويشوفوا البرزنتيشن بتاع الأكل حلو أوي لغاية ما واحدة أنا ناسيه اسمها جت لي مرة واحدة قالت لي إزاي، أنتِ إزاي بتعملي الحاجات الحلوة دي، وإزاي متظهريش، لا تعالى، وكانت أول حد يقدمني للتلفزيون، طلعت في السي بي سي سفرة مع أستاذة مفيدة، وأستاذة منى، ودي كانت أول حاجة، وأول ظهور ليَّا في التلفزيون وبعد كده توالت الأحداث.

**فيه وصفة قريبة لقلبك، بتحسي إنها بتحكي حاجة عن شخصيتك؟

المعجنات بكافة أشكالها بعشق العجين.

**إزاي بتقدري توازني بين شغلك كـشيف وحياتك الشخصية كأم وزوجة؟

هقول لك بقى في دي الفضل أولًا وأخيرًا لله سبحانه وتعالى أولًا، وربنا لما أكرمني وتفضَّل عليَّ إن أنا يبقى عندي شغل ما كنتش بشتغل قبل كده، أنا كنت زوجة وأم فقط لا غير لسنين كثير قوي لغاية ما سبحان الله بقى جه التوقيت المناسب، واللي ربنا شايفه إن هو مناسب بعد ما بناتي اتجوزوا بعد ما بنتين من بنات يتجوزوا فبقى عندي اللي يساعدوني في البيت، ويشيلوا عني حاجات تانية، فأنا توجهت للشغل ودخلت بقى في الموضوع بعمق أكتر.

**إيه نصيحتك لأي حد بيبدأ طريقه في عالم المطبخ وعاوز ينجح زي حضرتك؟

إخلاص النية والله العظيم وعلى نياتكم ترزقون يا جماعة وأبصم بالعشرة إن دي حقيقة وطبعًا ده كلام ربنا مفيهوش جدال، بس فعلًا أنا لمسته بإيدي إن كل ما كانت النية خالصة لوجه الله، كل ما كان توفيق ربنا معاكِ.

في نهاية حوارنا مع الشيف المبدعة فاطمة أبو حاتي، حابين نشكرها على وقتها وعلى كل التفاصيل الجميلة اللي شاركتنا بيها. أنتِ فعلًا مش بس شيف موهوبة، لكن كمان مصدر إلهام لكل ست بيت ولكل حد عنده حلم عايز يحققه.