محمد ناقد أحد أبرز أبناء حقل الإعلام .. استطاع خلال فترة وجيزة جدًّا أن يضع بصمته ويحدث أثرًا فعَّالًا ممَّا جعل الكثيرين داخل حقل الإعلام يشيدون بتجربته .. اقتربنا منه وكان لنا معه هذا الحوار.
>ممكن تحكيلنا عن البدايات الأولى؟
>>البداية أنا خريج كلية حقوق دفعة 97 بدأت حياتي محامي، بعد كده تمردت على المهنة لحبي لمجال الإعلام، تمَّ تعييني في التلفزيون المصري واتمرنت على أيدي أساتذة كبار واستثمرت الفرصة، بدأت حياتي الوظيفية معاهم معد برامج ومرة أستاذ محمد الشابة قال لي ستكون أصغر رئيس برنامج، وبالفعل وبعد حوالي خمس سنين وتحديدًا سنة 2005 كنت أصغر رئيس تحرير برامج في مصر، وكان دائمًا يقول عليَّ أنت مش محمد ناقد أنت محمد قائد وطبعًا بشكره على ثقته، وانتقلت لرئيس تحرير في اكسترا نيوز وقعدت حوالي ثلاث سنوات.. خضت بعدها تجربة من أربع سنين بفضل الله أقوم بتقديم برنامج الصنايعية على قناة الشمس من أنجح البرامج الاقتصاديَّة المتخصصة على الساحة وفي الآخر الإدارة العليا لقناة الشمس رأت فيَّ مواصفات المدير المجتهد، وبفضل الله تعالى أصبحت المدير التنفيذي لقناة الشمس على مدار 28 سنة في مجال الإعلام وربنا أنعم عليَّ بنعمة البصيرة، بشوف الفشل من بعيد وأبعد عنه وأي نجاح بيكون ليَّ بيكون بفضل الله، ثمَّ الناس وثقتهم فيَّ.. وكلها تجارب وكلها محطات..
>ما سر حب الناس لك في القناة لاحظناه من كلامهم عنك؟
>>أنا كنت واضح معاهم في أول اجتماع، وقلت يا جماعة إحنا بنبني قصة نجاح هننجح بيكم، معنديش أدوات بديلة ومعنديش رئيس ومرؤوس كلنا في مركب واحدة، وكل الأسماء اللي موجودة كفيله بأن تقوم مؤسسة مش قناة بس وميصحش الأسماء دي تكون موجودة ويكون المستويات لا تليق بأسمائهم والقناة عايزه محتوى واستثمار، والفلوس مش هتيجي إلا على المحتوى الكويس وده أول تحدي إحنا بنرتقي المحتوى.
>ما أهم التحديات اللي بتواجه فريق العمل في القناة؟
>>أول حاجة التواجد، إني أقول أنا موجود على الساحة.
تاني حاجة الانتشار وده بيكون أكبر تحدي إن أنا أنافس وأحافظ على الانتشار ده.
وأن أصبح مؤثرًا في وعي المجتمع المصري
>على أي أساس حددت نقاط التحدي؟
>>من خلال خبرة حياتي 28 سنة في المجال، اشتغلت مع قنوات كثيرة ومع ناس كبيرة منهم المرحومة صفاء حجازي، والأستاذ أنس الفقي، ومع الأستاذ أسامة الشيخ، وأنا كان حظي حلو في الحياة إني اشتغلت معاهم واتعلمت منهم يعني إيه صناعة محتوى الإعلام.
>كيف تقوم بتقييم نجاح البرنامج؟
>>من استدامته، إحنا بنعمل الدورة البرامجية ثلاثة شهور، طول ما البرنامج مكمل على الشاشة فهو ناجح؛ لأن بعد كل ثلاث شهور الصادق الأمين مع نفسه بيبدأ يقيم نفسه قبل ما يقيم الناس، فأنا بشوف هل البرنامج خلاص ولا استنفد الغرض منه، هل هو لسه بيؤدي نفس الرسالة اللي اتنشأ عشانها واللا لا، فطول ما البرنامج على الشاشة فهو ناجح + طبعًا المشاهدة.
>إزاي بتقدر تعزز من مهارات فريق العمل وبترفع من كفاءتهم؟
>>بالتدريب والتأهيل كلمة واحدة معنديش حد كبير على حد، أنا قبلهم بتعلم منهم وده كله بالتطوير، أنا كمحمد المعيار بتاعي كل القنوات الدولية سي ان ان، وسي بي سي، وسكاي نيوز، بشوف دايمًا القنوات دي أحسن مننا في إيه وإيه التكنولوجيا اللي بيستخدموها، وإيه الإمكانيات اللي عندهم اللي مش موجودة عندنا اللي مخليهم متطورين والنهارده السوشيال ميديا أكبر منافس للتلفزيون نجاح الانتشار فيها، وإن معظم الناس بتتابع عليها البرامج حتى برنامج الصنايعية بتاعي..
>هل تفضل تقديم البرامج ولا الإدارة؟
>>تقديم البرامج طبعًا، بحب أكون مع الناس، بحب أكون متواجد.
>ما النصيحة اللي تحب توجهها للشباب؟
>>طول ما أنت شغال اتعلم من أصغر واحد لأكبر واحد، متسيبش حد ما تتعلمش منه العلم، ركزوا وحطوا هدف ومتمشيش من غير هدف، متمشيش عشوائي خلي عندك هدف.
0 تعليقات